Namminersornerullutik Oqartussat kommunillu inissiaataat attartortittakkat sorliit pigisatut inissianngortinneqarsinnaannginnerat pillugu Namminersornerullutik Oqartussat nalunaarutaat nr. 25, 11. september 2002-meersoq.

 

Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu Inatsisartut peqqussutaanni nr. 5, 21. maj 2002-meersumi § 1, imm. 5 malillugu aalajangersarneqarput:

 

§ 1. Inissiat attartortittakkat suussusii sorliillu kinguliini taagorneqartut Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu Inatsisartut peqqussutaanni nr. 5, 21. maj 2002-meersumi pineqanngillat:
1) inissiat atorfimmut atasumik pinngitsoorani najugassat,
2) inissiat piginnittumit siunertanut aalajangersimasunut imaluunniit sulisorisat ilaannut immikkoortitat, soorlu inissiat siunertanut aalajangersimasunut immikkoortitat, ilinniartitsisunut nunaqarfinni inissiat, inuutissarsiutinik siuarsaanermut taamaaqataanulluunniit atasumik inissiaatit,
3) inissiat Namminersornerullutik Oqartussani pisortaatitanut inissiatut imaluunniit utaqqiisaasumik inissiatut atorneqartut,
4) inissiat inissiaqarfinni sulisunut attartortitsisumit atorfeqartitaasunut atugassiat,
5) inissiat innarluutilinnut imaluunniit aalassarluttunut immikkut sanaat ilusilikkalluunniit,
6) inissiat iluarsaassinernut isaterinernulluunniit atatillugu Namminersornerullutik Oqartussat kommunilluunniit inisseeqqinnissamik pisariaqartitsinerannik naammassinninnissamut atugassat,
7) inissiat inuit atugarisaat tunngavigalugit kommunalbestyrelsit innersuussinissaannut atugassiat,
8) inissiat inillu najugarineqartussaanngitsutut allatulli atorneqartut, aammalu
9) inissiat pilerinartutut isigineqartut, tak. imm. 2.
Imm. 2. Sulisorisanut inissiaatini inissiat sorliit pilerinartutut, taamaattumillu Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu Inatsisartut peqqussutaanni nr. 5, 21. maj 2002-meersumi pineqanngitsunut ilaanissaat, Naalakkersuisut aalajangiiffigisinnaavaat.
Imm. 3. Inissiat imm. 1 nr. 5-imi taaneqartutut ittut immikkorluinnaq pisuni Naalakkersuisut immikkut akuersissuteqarfigisinnaavaat, taamaalillutik taakku Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu Inatsisartut peqqussutaanni nr. 5, 21. maj 2002-meersumi pineqartunut ilaasussanngorlugit.

§ 2. Nalunaarut 1. oktober 2002 atuutilerpoq.

Namminersornerullutik Oqartussat, ulloq 11. september 2002

Jørgen Wæver Johansen

/

Jens K. Lyberth